Legg tína vitjan til rættis

Á Listasavni Føroya kanst tú fáa eina serstaka listauppliving í Viðarlundini í Havn.

Listasavn Føroya hevur eina fasta framsýning við tí besta av føroyskari list frá 1830árunum til í dag umframt ein skála til skiftandi serframsýningar.

Í summarhálvuni, frá juni til og við august, er hugnalig kafé í móttøkuni á Listasavninum. Kaféin borðreiðir við góðum kaffi og bakstri. Eisini er eitt úrval av lættari máltíðum, víni og øl. 

Í móttøkuni er eisini ein handil, og her finnur tú eitt stórt úrval av listabókum, plakatum, postkortum og gávulutum.

Í móttøkuni eru barnaborð, har familjur við børnum kunnu hugna sær við ymiskum kreativum uppgávum. Tit nýtast ikki at keypa atgongumerki fyri at nýta kafé, handil og barnaborð - tað er ókeypis, og øll eru vælkomin. Her er eisini ókeypis wifi. 

Vit kunnu viðmæla, at vitjanin á Listasavninum endar við einum túri gjøgnum Viðarlundina oman í býin. Tá ber til at síggja standmyndirnar uttanfyri savnið og njóta arkitekturin á Listasavninum. Svørtu skjaldrarnir minna um siðbundin føroysk neyst.

Finn veg

Til gongu: Listasavn Føroya liggur umleið 10 minuttir til gongu frá miðbýnum. Gestir kunnu koma inn á savnið gjøgnum Viðarlundina.

Við bussi: Bussur nummar 2 fer beint til hurðina. Far úr bussinum við bussteðgiplássið, sum eitur Gundadalur.

Í bili: Skelting vísir gestum í bili til parkeringsøkið hjá Listasavninum.