Kám og ógreið tekin sveima í einum bláum alheimi av orku, lættleika og opinleika. Innihaldið er tó ikki harðveðurs hæddir, tí heitið er tikið úr einum versi í Bíbliuni: “Vindurin blæsur, hagar hann vil, og tú hoyrir suðið, men tú veitst ikki, hvaðani hann kemur, og hvar hann fer; so er við einum og hvørjum, ið føddur er av Andanum.” (Jóhannes 3, 8).

Brotið er svar Jesusar til ein spurning um andaliga endurføðing ímóti likamligari føðing. Hetta andliga lívið snýr seg um frælsi, gleði og sjálvgloymsku, og tað er tað, sum listamaðurin hevur miðað eftir at avmynda í sínum myndum av vindi. Hesin vindurin kann fara úr guli upp í hvassan vind í andligu lýsingum hansara av føroyskum veðri.