Mæti rithøvundurin var eisini eitt frálíkt myndlistafólk. Í hansara arbeiði hevði pastellin ein týðandi leiklut, og íblásturin til stíl og myndevni í hesum verkum stavar frá norska myndlistafólkinum og teknaranum Theodor Kittelsen (1857-1914).

Trøllaheimurin hjá Kittelsen endurreisist hjá Williami Heinesen. Í landsløgunum tykist vera eitt gandakent huglag. Og her hava vit “trøllini” sjálv í hesari skemtiligu keipumyndini av stýrinum í einasta tryggingarfelagnum í Føroyum tá á døgum, sum sostatt hevði einkarrætt!

Sambært grafikara og myndahøggara Janusi Kamban eru stýrislimirnir frá borðendanum móti vinstru hesir: Christian Holm Jacobsen, útgerðarmaður, Leivur Lützen, sakførari, Hákun Djurhuus, løgmaður, J.F. Kjølbro, útgerðarmaður, Thorstein Petersen, sakførari, Dánjal Niclassen, stjóri, Jákup Pauli Christiansen, (Jákup Pauli hjá Mikkjali – pápi Eskild Christiansen, stjóra á Telefonverkinum), Jens av Reyni, tryggingarstjóri, Óla Jákup Jensen, skipari, og Arthur Brend, handilsmaður.