Uppliva eina føroyska oyggj innanífrá.

Far inn í Lítlu Dímun gjøgnum opini og uppliva eina oyggj innanífrá. Yvir og undir havflatanum.

Standmyndin ímyndar formin á minstu oyggini í Føroyum - Lítlu Dímun. Oyggin er sera brøtt, og serstaki formurin er her endurgivin eftir topografiskum kortum og settur upp eftir longdar- og breiddarásunum. Merkt við hvítum gummibondum kunnu vit fylgja støddfrøðiligu avlesingini av skapinum av oynni, umsett til eina geometriska standmynd, gjørd burturúr tunnum jarnstongum. Tjúkkari jarnstengur, sum mynda basan á oynni, eru harafturímóti ein endurgeving av klettinum undir havflatanum. Sum bylgjandi sinuskurvar minna stengurnar næstan um aldurørslur.

Endurskapanin av eini oyggj í minni lutfalli gevur okkum møguleikan at traðka inn í tað, sum í veruleikanum er óatkomiligur klettur. Vit eru orðarætt í Lítlu Dímun.

Føroysku oyggjarnar og klettarnir hava hvør í sær serstakar formar og drøg, sum ger tey afturkennilig. Fleiri klettar líkjast menniskjaligum formum ella djórum og hava fingið navn hareftir. Í føroyskum sagnum er harumframt eitt afturvendandi drag at lýsa klettar og steinar sum livandi verur við serligari megi. Tulkað í einum málningi ella í eini fotomynd kenna nógv Lítlu Dímun aftur á forminum. Men kenna vit eisini Lítlu Dímun, tá ið vit uppliva hana innanífrá umsetta til topografiskan form?