Í 1924 ferðaðist svenski fuglamálarin William Gislander í Føroyum og málaði umleið 100 málningar av føroyskum landsløgum og djóralívi. Gislander málaði um 20 verk í Mykinesi, og møtti har 18 ára gamla Sámali Joensen. Tað var Gislander, sum eggjaði Sámali Joensen-Mikinesi til at velja listina sum lívsleið.

Í septembur 1924 sýndi Gislander føroysku málningarnar hjá sær fram í Keypmannahavn. Hetta var fyrsta framsýning á evropeiska meginlandinum, ið lýsti Føroyar upp á ein samanhangandi, listarligan hátt. Uml. 95 % av verkunum frá framsýningini hjá Gislander eru í privatari ogn.

Bernhard Schirg (granskari, rithøvundur og filmsfólk) arbeiðir í løtuni við verkætlanini "Gislander 1924". Í hesum sambandi kemur hann til Føroya at savna vitan um listamannin og varpa ljós á søguna.

Sunnudagin 28. juni kl. 15 fer Bernhard Schirg at greiða frá ferðini hjá Williami Gislander til Føroya.

Tiltakið verður í forhøllini á Listasavninum og tað er ókeypis atgongd.

Øll eru hjartaliga vælkomin.

-

Bernhard Schirg ynskir at koma í samband við fólk, ið vita nakað um William Gislander ella kennast við listaverk hjá honum. Schirg vil fegin finna fram til listaverkini, og frætta meiri um ferðina.

Kennist tú við verk ella søgur frá ferðini hjá Gislander í Føroyum í 1924, eru tit vælkomin at siga okkum frá og vit bera boðini víðari til Bernhard Schirg, granskara.

Leinki til verkætlanina: www.gislander1924.eu