Hvør er byrjanin til tónleik í Føroyum, og hvussu hevur tónleikurin ment seg gjøgnum tíðirnar? Fá innlit í føroysku tónleikasøguna hóskvøldið 2. november, tá Knút Háberg Eysturstein, tónleikafrøðingur og tónleikari, heldur fyrilestur um evnið á Listasavni Føroya í sambandi við serframsýningina “Tónar í list”.

Fyrilesturin byrjar kl. 19.00 í forhøllini í Listasavni Føroya og varir í uml. 45 min. Ókeypis atgongd er til fyrilesturin. Listasavnið og Kafe list hava opið inntil kl. 20.00 hetta kvøldið.

Knút Háberg Eysturstein, f. 1980, er cand. mag. í tónleikafrøði og tónleikari. Umframt at hava givið tónleik út í egnum navni og verið við í nógvum tónleikaútgávum, hevur hann skrivað um, granskað og undirvíst í tónleiki. Hann er í løtuni Ph.d. lesandi og námslektari í tónleiki á Námsvísindadeildini á Fróðskaparsetri Føroya.

Mynd: Bjarni Árting Rubeksen