Góða menningin við teimum mongu gestunum og økta talið av skúlavitjanunum leggur trýst á teir núverandi fysisku karmarnar. Fyri at fylgja við eftirspurninginum, verður ein burðardygg ætlan um at framtíðartryggja, nýmótansgera og dagføra Listasavn Føroya løgd fram. Listasavn Føroya miðar eftir at fáa framtíðartryggjaðar karmar, sum seta gestin, børn og ung, listina og listafólkini í miðdepil.

Ætlanin er í trimum pørtum: Hølið til serframsýningar fær eitt neyðugt lyft, fasta framsýningin verður økt við einum sali, og Føroyar fáa sín fyrsta barnaverkstað, ið verður karmur um skapandi virksemi og myndlistaskúla. Verkætlanin er tillagað umhvørvið og í samljóði við Viðarlundina, samstundis sum arkitektururin fer at fríðka um umhvørvið.

Serframsýningar í tíðarhóskandi kørmum

Savnsbygningurin frá 1970 er í dag niðurslitin og livir ikki upp til nútímans mál fyri savnsvirksemi. Tí kann savnið ikki læna listaverk frá útheiminum ella skipa fyri altjóða framsýningum til gagns fyri gestirnar. Tí eru ætlanir um at gera neyðugar dagføringar av bygninginum við støði í sama úttrykki, sum upprunaligi bygningurin, og í sama anda sum upprunaligi Listaskálin. Takið fær tað sama eyðkenda skapið við skákgangandi toppum við ljósbondum. Innaní fara tey stóru, broytiligu rúmini at verða varðveitt, og bygningurin fær tíðarhóskandi ventilatión, ljósumstøður og eina lyftu, sum gevur øllum atgongd á jøvnum føti. Við hesum kann listin upplivast í tíðarhóskandi og tryggum karmum, og savnið kann miða eftir at gera altjóða samstørv um framsýningar og miðlan. Arkitekturin handan upprunaliga Listaskálan frá 1970, J.P. Gregoriussen, náddi at síggja skitsutekningarnar til dagførdu verkætlanina og stuðlaði og tók undir við ætlanini, áðrenn hann andaðist í 2021.

Tilbygningur – Tann fjórða pyramidan og takterassa

Savnið hjá Listasavni Føroya er økt við fleiri enn 50% tey seinastu 30 árini. Hetta hevur við sær, at fleiri høvuðsverk eru í goymsluni og ikki sýnd fram. Harafturat hevur savnið ikki umstøður at vísa ta nýggjastu samtíðarlistina, fotomyndir, video og annað.

Í byggiætlanunum til tað upprunaliga savnið frá 1993 var ætlanin at byggja ein fjórða stóra framsýningarsal, sum eitt framhald av teimum trimum núverandi salunum. Savnið ynskir at fremja hesar ætlanir fyri at fáa pláss til tað skjótt vaksandi savnið av list. Í ætlaða salinum verða hóskandi karmar til at sýna fram standmyndir og verk, sum eru viðkvom fyri ljósi, sum til dømis fotomyndir, grafikkur og videolist.

Bygningurin fer at vera í sama kvadratiska formi sum hinir tríggir salirnir, men hann verður klæddur við organiskt formaðum viði, eins og bygningurin til serframsýningar. Á takinum verður ein terassa við grønum uttanduraøki við útsýni yvir Listasavnið, Viðarlundina og Havnina.

Barnaverkstaður og fyrilestrasalur

Nógv børn vitja Listasavn Føroya dagliga, men savnið er bygt uttan karmar til skúlatænastu, kreativan verkstað, myndaskúla og uttan nóg nógv ves og klædnagoymslu til børn og ung. Savnið upplivir stóran eftirspurning frá skúlunum og barnafamiljunum, og við einum barnaverkstaði verða børn og ung sett enn meira í miðdepil. Barnaverkstaðurin er tann fyrsti av sínum slagi í Føroyum. Her kunnu skúlaflokkar, dagstovnar, barnafamiljur og ungir listaspírar fordjúpa seg í skapandi virksemi.

Ein glasdurur knýtir forhøllina á savninum saman við barnaverkstaðin. Barnaverkstaðurin fer eisini at hava fyrilestrasal og ein open-studio verkstað, har listafólk kunnu skipa fyri verkstovum.

Økið við barnaverkstaðin verður fríðkað við nýggjum rásum og einum grønum garði við sitiplássum og standmyndaspæliplássi.

Uppskotið hevur savnið gjørt í samstarvi við BRIM Arkitektar.

Verkætlanin hevur fingið tilsøgn um stuðul frá: Augustinus Fonden, Aage og Johanne Louis-Hansen Fond, Villum Fonden og Føroya Landsstýri.

Viðkomandi slóðir:

Røða - Karina Lykke Grand: Tale_Karina Lykke Grand_16.6.2023.pdf 

Pressumappa: Myndir - Tekstir

Ljóðarin við Gunnar Nolsøe (15.06.23)

Innslag úr Degi og Viku (16.06.23)