Takk til øll tykkara, sum vóru til ferniseringina á serframsýningini Less is North og vóru við til at gera henda seinnapartin til nakað serligt. Serframsýningin lat upp fríggjadag 6. september; savnsstjóri Karina Lykke Grand helt røðu og greiddi frá teimum trimum listafólkunum og listini á framsýningini, og fotolistamaðurin Per Bak Jensen setti framsýningina.

Fleiri fólk høvdu leitað sær á Listasavnið henda dagin at hátíðarhalda upplatingina. Tey trý listafólkini á framsýningini, Per Bak Jensen úr Danmark, Hallgerður Hallgrímsdóttir úr Íslandi og Ingi Joensen úr Føroyum, vóru tilstaðar, og fleiri gestir tóku sær dælt av møguleikanum at práta við tey um ta flottu fotolistina.

Nakrar dagar eftir upplatingina vitjaði Kári Olsen frá Summarmorgni og prátaði við savnsstjóra, Karinu Lykke Grand, um framsýningina. Innslagið kann hoyrast her

Listasavnið er opið frá kl. 13-16 allar dagar í vikuni uttan mánadag.

Myndirnar í hesi greinini hevur dugnaliga íslendska listakvinnan Hallgerður Hallgrímsdóttir tikið. Hon hevur deilt tær á sínum Instagram-vanga. Til ber at vitja vangan her.

Hevur tú myndir av framsýningini og ferniseringini, sum tú fegin vilt deila, ert tú vælkomin at senda tær til info@art.fo Brúka eisini fegin #listasavnforoya á Instagram og Facebook.