Randi Samsonsen bjóðar inn til at vera partur av einari komandi listaverkætlan á Trapholt, museum for moderne kunst og design í Kolding í Danmark.

Í hesum sambandi hevur hon ein Masterclass / Craftsalon (ein uppstart) á Listasavni Føroya, so føroyingar eisini hava møguleika at luttaka í listaverkætlanini. Tað er ÓKEYPIS. Randi hevur tilfar og vegleiðing tøka. Um tað ikki ber til at koma til tiltakið, so er møguleiki at fáa tað frá Randi seinni. Tiltakið verður leygardagin 11. mars kl 14 - 16. Meldið tykkum endliga til, so vit vita, hvussu nógv kaffi og te skal setast fram. Tey, sum luttaka, fáa ókeypis atgongd til framsýningarnar á savninum hendan dagin.

Í listaverkæltanini “Things Matter” bjóðar Randi Samsonsen okkum at hugsa um list, standmyndir og minnismerkir í tí almenna rúminum. Hvat fyri týdning hava tey fyri okkum, og hvat kundi verið áhugavert at broytt? Vit fara at binda eina pinkustødd av einari standmynd, minnismerki ella aðrari list í tí almenna rúminum og hugsa um, hvussu vit kundu hugsað okkum tað kundi verið øðrvísi. Tað ber til at vitja hesa leinkju fyri at lesa og hoyra meiri um verkætlanina: https://trapholt.dk/things-matter/

At binda er at skapa eina 3D rúmd. Oftast er hetta brúkt til klæðir, men tað ber eisini til at brúka tað sum ein miðil, har vit sansaliga kunnu byrja eina "samrøðu" við okkara umhvørvi; í hesum førum listina í almenna rúminum. Í verkætlanini eru vit við til at skapa eitt samansett felagsverk, sum verður at síggja á Trapholt seinni í ár, umframt at tað verður ein partur av teirra savni. Freistin at lata bundnu standmyndina inn er 20. apríl í Tórshavn.

Randi kemur at stuðla ígjøgnum tilgongdina, um tað er brúk fyri hesum. Eisini er ein facebook-bólkur (https://www.facebook.com/groups/1201267647456332), har til ber at síggja, hvussu arbeiðið fer fram umframt at fáa og geva góð ráð.