Nú vit eru komin inn í desemburmánað, fara vit at líta aftur á listainnkeypini í 2021.

Í maimánaði keypti Listasavn Føroya svørtu, bleytu standmyndina “Tað, tú leggir eftir teg” eftir Maibritt Marjunardóttur. Standmyndin er bundin úr gomlum videobondum og var við á ársins Várframsýning. Karina Lykke Grand, stjóri, sigur, at tað, at verkið er bundið, gevur tilfarinum ein heilt serligan form. Standmyndin er sum ein fremmand, dragandi rúgva av nøkrum, vit hava lagt frá okkum – nevniliga gomul video frá tíðini við VHS-bondum. Samstundis peikar verkið frameftir við at víðka okkara fatan av standmyndini sum grein.

Listasavn Føroya hevur eisini keypt eina røð við 30 fotomyndum eftir Inga Joensen við heitinum “Í Kerinum 40”. Myndirnar vóru ein partur av framsýningini “Heimstaðurin” og vóru sera væl umtóktar millum gestirnar. Karina Lykke Grand, stjóri, sigur soleiðis um verkini: “Ingi Joensen hevur tikið fotomyndir við 30 ára millumbili á adressuni Í Kerinum 40 í Sumba – í 70’unum og aftur í 2015. Verkini eggja til samrøður og spurningar um tað at kenna seg heima og um, hvat ger eitt hús til eitt heim. Samstundis er røðin við til at styrkja um fotolistina í samlingini.”

Triðja og seinasta keypið er málningurin “Toruluft, Vorupør” frá 1939 eftir Ruth Smith. Listakvinnan hevur málað málningin av toruluft á einum summartúri til Vorupør í Norðurjútlandi. Legg til merkis litirnar og megina, ið eru serliga sterk í hesum málninginum.

Sum tit síggja, fevna innkeypini bæði um eina standmynd, fotomyndir og ein málning. Vit eru fegin um at víðka samlingina við verkum úr ymsari tøkni, sum er ein raðfesting í innkeypsætlanini.