Kundi tú hugsað tær at sæð framsýningina HEIMSTAÐURIN? Og vilt tú fáa meiri at vita um tey einstøku listaverkini?

Hóskvøldið 1. juli kl. 19.30 verður rundvísing í framsýningini HEIMSTAÐURIN og savnið hevur opið um kvøldið frá kl. 19.00 – 21.00.

Solveig Hanusardóttir Olsen, savnsumsjónarfólk, fer at vísa runt og greiða frá tankunum handan framsýningina.

Rundvísingin byrjar kl. 19.30 og tekur umleið 45 min.

Øll eru hjartaliga vælkomin.

Rundvísingin er ókeypis fyri limir við árskorti til Listasavn Føroya. Hevur tú árskort av slagnum “1+1 – tak ein gest við ókeypis” ert tú eisini vælkomin at taka ein gest við til rundvísingina.

Atgongugjald: 90 kr. fyri vaksin, 25 kr. fyri lesandi, 70 kr. fyri pensjonistar. Børn og ung undir 20 ár sleppa ókeypis inn.

Til ber eisini at keypa árskort í móttøkuni. Árskortini geva ókeypis atgongd til savnið alt árið umframt ókeypis atgongd til rundvísingar, tiltøk og konsertir. Ein valfrí plakat fylgir við árskortinum 

---

Um framsýningina

Heim er eitt háfloygt hugtak. Heimið kann vera eitt ítøkiligt stað fyri onkran – eitt hús, eitt barndómsheim ella ein gøta. Fyri onnur er tað ein kensla av at hoyra til – í einum býi ella einum umhvørvi. Fyri onnur er heim tað staðið, har hjartað er, og har mann helst vil vera – saman við sínum kæru. Fyri mong føroysk myndlistafólk hevur heimstaðurin ein serligan leiklut, bæði persónliga og sum myndevni. Men við hvørjum kenslum hava listafólkini avmyndað teirra heim? Hvat hendir, tá ið eitt heim hvørvur, og tá ið hús verða seld, og eldri ættarlið falla frá? Kann ein luktur, ein litur ella ein kensla vekja sterk minni um eitt heim, sum einaferð var?

Framsýningin HEIMSTAÐURIN varpar ljós á, hvat ein heimstaður er, og hvønn týdning tað hevur at hava ein heimstað.

Á framsýningini eru verk eftir: Arnold Vegghamar, Bárður Jákupsson, Bergithe Johannesen, Edward Fuglø, Elinborg Lützen, Hanni Bjartalíð, Ingálvur av Reyni, Ingi Joensen, Jack Kampmann, Jóannis Kristiansen, Marianna Bjørgheim, Marius Olsen, Randi Samsonsen, Ruth Smith, Sámal Joensen-Mikines, Steffan Danielsen, Thomas Arge, Torbjørn Olsen, Tróndur Patursson, Zacharias Heinesen.

Les meira um framsýningina her.

  
Vælkomin á Listasavn Føroya!