Fríggjadagin 17. mai letur framsýning upp við listakvinnuni Anný Djurhuus Øssursdóttir.

Listakvinnan Anný Djurhuus Øssursdóttir er eitt av ungu føroysku listafólkunum, ið er undir útbúgving á akademiinum í Keypmannahavn. Hon hevur verið virkin á føroyska listapallinum í nógv ár við verkum, ið líkjast burturfrá tí, ið vit kenna til list í Føroyum. Hennara verk spenna víða, og hon arbeiðir við ymiskum tilfari og gerandislutum, ið hon setir saman til støðumyndir, ið fáa okkum at steðga á og undrast - júst sum góð list kann. Anný hevur sýnt fram ymisk støð, ið vit vanliga ikki seta í samband við framsýningarhøli, eitt nú í viðarlundini í Havn.

Seinastu árini hevur hon arbeitt við at skapa baktjøld til heimligar, stillførar hendingar. Eitt slag av pallseting, ið setir sjóneykuna á húsið sum skap, ið er karmur um ymisk sosial-, andlig- og samfelagsviðurskifti. Framsýningin “Time Out of Time” er ein slík installatión, har kenslulødd rúm gerast minnisgoymslur, fullar av nostalgi og undran.

Minnisgoymslurnar í verkunum hjá Anný vekja bæði góð og mein minni. Í umhvørvunum, ið lýst vera, kemur eitt íborið tvílyndi til sjóndar. Stundum geisla tey hita við sólarljósi og fjálgum huglagi. Um somu leið dvølur ein órógv undir, har tað ókenda rúmið og tann nívandi tómleikin gevur hugflognum rúmar ræsur. Hugsaður ótti, ið kann forða einum barni at fara upp trappurnar út móti skýming, ella tann rópandi tómleikin, ið rakar heimið, tá familjan er farin hvør til sítt. Áskoðarin stígur inn í eitt trúnaðarrúm uttan at verða boðin inn og kann bert ímynda sær, hvat er farið fram áðrenn tøgnin tók yvir. Tær kámu fotomyndirnar av heimligu umhvørvunum hava eitt afturlítandi huglag og leggja upp til, at vit bæði skoða úteftir og inneftir. Á hendan hátt megnar Anný at siga eina søgu um gyklað minni, ið bæði eru persónlig og almenn.

Framsýningin “Time Out of Time - A Silent Drama” letur upp 17. mai á Listasavni Føroya.

Øll eru hjartaliga vælkomin.