Grøn eru grá hús

Vælkomin á Ólavsøkuframsýningina 2021 hjá Listafelagi Føroya á Listasavni Føroya, sum í ár eitur Grøn eru grá hús.

Framsýningin er opin til tann 22. august. 

Listafelag Føroya tók fyrstu ferð stig til at gera eina listaframsýning sum part av ólavsøkuhaldinum í 1948, og síðani er framsýningin vorðin ein týdningarmikil og siðbundin partur av ólavsøkuni. Ólavsøkuframsýningin hevur ymiskar fyriskiparar hvørt ár, og í ár hevur Listafelag Føroya heitt á listakvinnuna Hansinu Iversen um at standa fyri framsýningini. Hansina Iversen hevur eggjað øllum áhugaðum at senda list inn til metingar, og við støði í hesum hevur hon valt fjølbroytt verk, sum kunnu upplivast á framsýningini.

Ársins framsýning er ein heilsan til navnframa listamannin Ingálv av Reyni (1920-2005). Málningar eftir Iistamannin eru snúningsdeplar í framsýningini, og fleiri teirra hava ikki verið sýndir fram í mong ár. Heitið Grøn eru grá hús er úr teksti, sum Karsten Hoydal skrivaði um listina hjá Ingálvi av Reyni um tað mundið, tá ið listamaðurin hevði funnið fram til sítt abstrakta, ekspressiva myndamál. Hann vónaði, at teksturin hjá Karsteni Hoydal kundi fyrireika áskoðararnar upp á tað, sum teir fóru at síggja og uppliva.

Ein faldari við kunning um listaverkini er gjørdur til framsýningina.

Vælkomin á Listasavn Føroya!