Tað er nakað gandakent við speglingum, ikki minst í hesari standmyndini. Myndin av bæriligu barnakonuni er endurtikin á høvdinum. So hvør speglar hvørja? Ein onnur spegling er kletturin, hon stendur á, men her er tað heldur mótsatta pyramidan í speglingini, og ikki sjálvur kletturin, sum vit síggja.

Gátuføra standmyndin er tó samstundis nærverandi, orsakað av stoffkendu yvirflatuni. Hon hevur í stóran mun dám av tí arbeiði, sum listafólkið hevur lagt í leirið. Tískil fáa vit eisini eina hóming av, hvussu standmyndin varð gjørd.

Hitin og nærveran í standmyndini er í samsvari við barnakonuna og varpar ljós á tað ítøkiliga í tí óítøkiliga. Og vit sleppa at nema við!