Regn er litleyst, men her er tað reytt. Tann einfalda og klára reyða grundin verður brotin við hugskygdum svørtum og grátónaðum penslastrokum. Oman á hesum eru myrkir og ljósir slettir av tunnum liti, sum regna oman eftir flatanum.

Tann reyði liturin kann ímynda eldhuga, ágrýtni og kærleika, men eisini blóð, pínu og undirgang. Ja, í frásøgnini í Bíbliuni um tær seinastu tíðirnar, regnar so sanniliga blóð av himli (Opinberingin 8, 7). Ella kanska snýr myndin seg bara um ein regndag millum reyðu húsini á Tinganesi!

Málningurin er non-figurativur. Hann endurgevur ein veruleika, sum ikki kann allýsast, men sum Ingálvur av Reyni hevur málað seg inní. Vit eru við í gongdini við okkara boðum um, hvat myndin snýr seg um, í spenningsgeilini millum heitið og myndtilveruna sum litir, flatar og penslastrok.