Føroysk list fyri føroyska list: Tær fimm fuglamyndirnar, sum á undursaman hátt eru til enn, eru málaðar í eini tíð, tá ið eingin hugsaði um list og listafólk í Føroyum.

Díðrikur var húskallur í Sandoynni. Eitt skifti arbeiddi hann hjá einum presti, sum var náttúruáhugaður. Hjá honum hevur evnagóði húskallurin sæð onkrar fuglabøkur og hevur gjørt myndatalvurnar um til prýðiligt almúgusnið.

“Maanens Duuer” stendur at lesa á einum av bløðunum. Hetta var navnið á bládúgvuni, sum alt várið varp eitt egg um mánaðin. Tað skaldsliga navnið hevur tó sett hugflogið í gongd, tí hesar dúgvurnar eru litríkari enn bládúgvan. Díðrikur hevur avmyndað eina á einum av hinum bløðunum (tað niðast til vinstru).