Morgun, á Trappuni í Nólsoy (1969), Steffan Danielsen
60 x 100 cm
Í dimmalættingini hevur myrkrið ikki rættiliga slept takinum á bygdini.
Útsýnið er frá staðnum nevnt á Trappuni í Nólsoy. Her stóðu húsini hjá ommu og abba Steffan Danielsen, og hiðani hevur hann málað fleiri myndir við útsýni yvir móti Høgoyggj: Myrk og hvøss sum tey svørtu húsini fremst í myndini.
Útsýnið gevur høvi at mála fínligu og stívu flatukompositiónina á húsaskjøldrunum og tekjunum, so at tað næstan verður abstrakt. Samstundis sleppa vit at kaga innum, og í ljósinum har inni eygleiða vit við forvitni: gardinur, urtapottar, eina kannu, eitt breyð – og eitt slímandi kertiljós?
Men hugnin blandar seg við kensluna av at vera útistongd.
Steffan Danielsen
(1922-76)