Tey svørtu teknini á litaðu bakgrundini umskapa hana til eitt rúm av liti.

Íblásturin er upplivingin av brattlendi, sum speglast í sjónum. Bergbygnaðurin verður til skreytskriftartekn, meðan litir sum gult, reytt og blátt vísa, hvussu sjógvurin broytist í skiftandi lýsi.

Tey svørtu teknini streyma uppeftir eins og grótbræðingin, sum í sínari tíð skapti Føroyar. Í óavmarkaða litrúminum verða tey streymandi teknini ein mynd av alheimsins frummátti.

Um tygum ynskja eina kropsligari uppliving av alheiminum, kunnu tygum vitja glas/spegl-installatiónina Bládýpið, sum eisini er á savninum. Vinaliga spyr savnsvørðin.