Í sambandi við at Karina Lykke Grand hevur tikið við starvinum sum stjóri á Listasavni Føroya, bjóðar Listasavn Føroya til kaffiprát. Eitt óhátíðarligt høvi at práta um virksemi á savninum, at koma við góðum hugskotum ella bert at nýta høvi at heilsa uppá og síggja framsýningarnar.          

Kaffiprát verður týsdag til fríggjadag, 6. til 9. august frá kl. 15 til 17. Í hesum sambandi verður skrivstovan flutt út í kaféina í forhøllini, soleiðis at gott pláss er at heilsa uppá. 

”Eg gleði meg til tær næstu vikurnar og mánaðirnar at hitta øll, ið hava áhuga fyri savninum, at hitta listafólkini í Føroyum umframt gestirnar á savninum. Til kaffiprátið eru vit eisini til reiðar at taka ímóti input, sum partur av framhaldandi arbeiðinum at menna Listasavn Føroya til eitt enn meiri viðkomandi stað fyri gestirnar á savninum. Øll eru hjartaliga vælkomin at heilsa uppá afturvið einum kaffimunni”, sigur Karina Lykke Grand.

Fyrst og fremst er ætlanin at styrkja savnið, sum ein viðkomandi og sjónligan stovn, ið styrkir kunnleikan til føroyska list fyri eini breiðari fjøld. Harumframt er ætlanin at miðla, hvussu visuella listin gjøgnum tíðirnar hevur spælt ein stóran leiklut í menningini av føroyska samleikanum.

Listin hevur eini serlig evni til at fanga sereyðkenni í eini tjóð, sum ikki minst er sjónligt her í Føroyum. Í dag eru Føroyar sermerktar við nógvari list í almenna rúminum, eins og føroyingar hava nógva list hangandi í heiminum í mun til hvat vanligt er í nógvum øðrum evropeiskum londum. Eg gleði meg sera nógv til at bjóða inn til kaffiprát”, sigur Karina.

Nýggi stjórin er í summar flutt til Hoyvíkar saman við familjuni og tekur við starvinum sum stjóri á Listasavni Føroya tann 1. august.

Karina Lykke Grand tekur við eftir Nils Ohrt, sum hevur verið stjóri síðani 2011. Seinni í august verður fráfaringarmóttøka fyri Nils Ohrt.

Aðrar upplýsingar:

Listasavn Føroya bjóðar til kaffiprát týsdag til fríggjadag 6.-9. august frá kl. 15 til 17.

Øll eru vælkomin.

Listasavn Føroya er opið hvønn dag frá kl. 11-17 í summarhálvuni.

Samband:

karina@art.fo

Karina: +298 21 42 82

www.art.fo

Gundadalsvegur 9, Tórshavn.

Fakta um nýggja stjóran:

Yrkisleið:

Karina Lykke Grand, 45 ár

·         Frá 1. august 2019 stjóri á Listasavni Føroya

Áðrenn hetta:

·         Magistari í listasøgu frá Aarhus Universitet og Ph.d. í listasøgu sama stað

·         Lektari í listasøgu, Aarhus Universitet

·         Savnsumsjónarfólk á Randers Kunstmuseum, Skovgaard Museet og Trapholt

·         Kurator og ráðgevi fyri ARoS Aarhus Kunstmuseum

·         Nevndarlimur í Randers Kunstmuseum

·         Nevndarlimur í Det danske Institut i Rom

·         Advisory board limur í Nordic Institute of Art

·         Limur í Young Academy of Europa

·         Granskingarleiðari av verkætlanini “Art and the Formation of National Identities”, stuðlað av Det danske        Forskningsråd.