Ny Carlsbergfondet í Danmark stuðlar Listasavni Føroya við eini góðari millión til listainnkeyp. Stuðulin fer til at keypa listaverk eftir Edward Fuglø, Astri Luihn, Aldu Mohr Eyðunardóttur, Titu Vinther, Brand Patursson, Súsan í Jákupsstovu og Sigrun Gunnarsdóttur. Seks av verkunum verða í løtuni sýnd fram á savninum. Stuðulin ger tað møguligt at keypa hesi verkini, soleiðis at tey verða ein fastur partur av samlingini. 

Karina Lykke Grand, stjóri, sigur soleiðis um serstaka stuðulin:

“Vit eru ótrúliga glað fyri, at Ny Carlsbergfondet velur at játta eina so stóra upphædd til at keypa føroyska list. Tað er av stórum týdningi, at Listasavn Føroya leypandi kann leggja nýggj høvuðsverk aftur at samlingini og á henda hátt vísa tað besta av føroyskari list. Stuðulin fer til at keypa stór, týdningarmikil verk, ið øll eru rættiliga nýggj – tey eru frá 2006 til 2022. Fjølbroyttu verkini eru við til at styrkja samlingina og vísa fleiri rák innan føroyska list.”

Seks av verkunum kunnu longu nú upplivast á Listasavni Føroya. Savnið er opið týsdag til sunnudag frá kl. 13-16. Frá 1. mai er opið hvønn dag frá kl. 11-17.

LISTAVERK

Edward Fuglø (f. 1965)
Whale-War, 2019.
Blandað tilfar, 200 x 5160 x 160 cm.

Astri Luihn (f. 1949)
Wings and Waves for Queen Dagmar, 2012.

Akrýl á lørift, 200 x 400 cm.

Astri Luihn (f. 1949)
Oceanic View, 2012.
Akrýl á lørift, 160 x 320 cm.

Alda Mohr Eyðunardóttir (f. 1997)
At broyta tað, ið var meiningin, 2020.
Ull, nylon, lín, silki, stáltráður og steinar, 250 x 250 x 300 cm.

Tita Vinther (f. 1941)
Segl, 2006.
Menniskjahár, lín og rustað jarn, 135 x 530 x 400 cm.

Brandur Patursson (f. 1977)
Lívrunnið landslag, 2016.
Video, uppvørpa, glas og stál, 110 x 106 x 110 cm.

Sigrun Gunnarsdóttir (f. 1950)
Fjallið, 2010.
Olja á lørift, 160 x 130 cm.

Súsan í Jákupsstovu (f. 1946)
Varði, 2022.
Tøvd ull og plantuliting, 70 x 70 x 75 cm.