Bygningurin

Listasavn Føroya heldur til í einum svørtum bygningi í norðara endanum av Viðarlundini. Rundanum bygningin standa fýra bronsustandmyndir eftir Hans Paula Olsen.

Listasavn Føroya er sett saman av tveimum pørtum, einari framsýningarhøll, Listaskálin, sum varð bygd í 1970 eftir tekningum frá J. P. Gregoriuseen, arkitekti, umframt einum størri parti, sum varð bygdur í 1993 við framsýningarhølum, forhøll og skrivstovum, teknaður av Niels F. Truelsen í samstarvi við Gregoriussen.

Elsti parturin av Listasavni Føroya, Listaskálin, er ein svartmálaður, rektangulerur bygningur við skrátaki og ljósi úr erva. Stóra framsýningarhølið verður í dag brúkt til skiftandi serframsýningar.

Útbyggingin frá 1993, sum rúmar føstu framsýningini, er sett saman av framsýningarskálum í tveimum støddum. Nógvu skjøldrarnir gera, at bygningurin minnir um neyst, meðan bygningurin innandura er merktur av einum einføldum stíli við trægólvi. Gólvið er gjørt úr viði frá eini ódn í 1988, tá ið ein stórur partur av trøunum í Viðarlundini fórust.

Forhøllin bjóðar hentleikar so sum kafé, handil og atgongumerkjasølu. Frá kaféini og gjøgnum nógvu vindeyguni á Listasavninum kann gesturin njóta vakra útsýnið yvir Viðarlundina.

Útbyggingin varð fíggjað við almennum og privatum stuðlum:

Føroya Landsstýri, Tórshavnar Kommuna, Listafelag Føroya, Fossbankin, Bókhandlarin Hans og frú Kate Niclasen - Dronning Margrethe og Prins Henriks Fond, Augustinus Fonden, Beckett-Fonden, Knud Højgaards Fond, Velux Fonden